Pann Saath & Katha

 

Pann saeth & katha 

पन्न  स।थ  कथा 

यि हा बऽ ओस रैथन मंज़ रिथा, बादिर पॆठ विनायक चोरम तऽ आठवाराऽ।

यिह बि ओस अख राज़ा, राज़बायि तऽ राजकुमारि। राज़बायि ओस नाव बीबा धरम मोजि। यि आस प्रथ वरिय रोठ करान।

अमि वरिय ति ओस अमि रोठ कोरमुत तऽ ओस पूज़ायि हुंद वख़्त। राज़स वोनुख़ पूज़ा करन ख़ातर, मगर राज़स ओस सेठा अहंकार। राज़न वोन बीबा धरम माजि, “यि छु सोरुय बे मतलब।”

बीबा धरम मोजि गव सेठा दुख़। दोयमि दोहन येलि राज़ा निंद्रि वुठ—राज़स वुछ शॆछ ज़ि बैयि राज़न छु हमला कोरमुत।

येलि राज़ा तोर वोत, तति कोरुख़ सु जलायि वतन। बीबा धरम माजि ति वुछ शॆछ ज़ि यिमन नॆख़ साऱ्यि राज़सि, यिथ पाअठ सपदॆयि तिम सेठा ग़रीब। चुनकि ज़िंदा ओस रोज़ुन, यिमन ओस नु बायन गरन मंज़ नौकरी करनु वराय काहं ति चारय।

अमि राज़बायि कर गुरि तबेलस मंज़ मोहनिव कर। अमिसुंज़ कूर आस करान लूकन हिंद्यन गरन काम, गर तऽ बान साफ़ करान।

अकि दोहन येलि यि कूर आस अख गर साफ़ करान, अमि वुछ तिम तत्य रोठस पूज़ा करान। अमिस कोर यि सेठाह ख़ुश। अमि कोरिहनि वोन पननि माजि यि सारुय कथा।

दर जवाब माजि वोननसः “कूर्य, असि ति हॆ आसि यि पूज़ा करान, मगर छानिस मालिस ओस स्येठाह अहंकार तऽ तमि कर अथ पूज़ायि सेठाह अनादर। तनयि पॆठि छुय चोन मोल जलायि वतन।”

कोरि वोननस दिल फुठिथ, “असि ति हॆ कराव यि रोठ। द्याव असि सपदि हालि मुश्किल।”

माजि वोननसः “कूरि, रोठ करनस हबी गछि आसुन गेव, मोदर तऽ ओट। असि कति अनव यिम चीज़?”

कूर वुछिस गुरि तबेला पॆठ सोमबरावव वुश्क फॉलि, तिमय छलाव शुरूचि श्रानि पिहाव। बैयि अनव गोर शकर। तमि सूत्य बनोव माजि कोरि रोठ।

यिथुय यिमव रोठ बनोव, तिथुय वुछ यिमन शॆछ ज़ि राज़ा त्रोवुख़। यिम सपदय सेठाह ख़ुश। यिम द्रायि दवान तऽ दोरान राज़ा वुछनि।

तिथुय वुछ ब्याख़ ख़बर ज़ि यॆथ नावि मंज़ राज़ा ओस यिवान, सु नाव फाट। यिमन पॆव याद तऽ ज़ि यिम वुछि मंज़ रोठ पूज़ायि मंज़ थोड़ा। दवान तऽ दोरान गयि वापस।

करिख़ साऱ्यि पूज़ा बैयि शुरू। तिथुय छाव राज़ा बरि किन। येलि राज़ा छाव, तऽ गोड़नॆथि अथ बुथ छ़लिथ करुन रोठिच पूज़ायि हेन, बैयि ट्योक ति।

राज़स म्यूल वापस राज़ दरबार। यिम गयि वापस पननिस महलखानस मंज़, तऽ म्यूलुख़ सुख़ तऽ संपदा।

यिथ कन्य तिमन संकट कोसुन, तिथय कन्य काऽसितन असि ति। यिथ कन्य तिमन आव सुख़ तऽ संपदा, तिथय कन्य यियतन असि ति शुर्यन-कट्यन सान, अंगन तऽ अश्नावन सान।

सारिनुय काऽसित्यन संकट, दोस्तन तऽ दुश्मनन सान, यि यियतन ब्रोंठि।

इति शुभम् अस्तु।